వికీపీడియాలో చేసే కృషి ఎంతో సాముదాయికమైనది. తోటి వాడుకరులతో ఎలా కలిసిమెలిసి పనిచెయ్యాలో తెలుసుకునేందుకు రెండు మంచి మెట్లు ఉన్నాయి. అవి: వెనకాడకుండా ఉండడం, మర్యాదగా ఉండడం.
దిద్దుబాట్లు చేసేటప్పుడు, వెనకాడకండి! ఇక్కడ చేసే సవరణలు చాలావరకు విజ్ఞానసర్వస్వాన్ని మెరుగుపరచేవే. తప్పులేమైనా దొర్లితే వాటిని సవరించుకోవచ్చు. ఏ వ్యాసాన్నైనా మెరుగుపరచవలసిన అవసరం మీ దృష్టికి వస్తే వదలకండి, వెంటనే దాన్ని మెరుగుపరచండి. ఏదైనా చెడిపోద్దేమోనని భయపడకండి. మీరు చేసే మార్పు మెరుగుదలకు దోహదపడేదే అయితే, ఆ సంగతి ఇతరులకు అర్ధమైతే, అంతా మంచే జరుగుతుంది. మీ మార్పు నిలబడిపోతుంది. అలా కాని సందర్భంలో, ఆ మార్పును ఎవరైనా ఇట్టే తిరగగొట్టవచ్చు.
మర్యాదగా ఉండడమంటే, ఇతరులను గౌరవించడం, వారు సదుద్దేశం తోనే పనిచేస్తున్నారని భావించడం, వ్యక్తిగత విషయాలపై కాకుండా, దిద్దుబాట్ల పైనే దృష్టి పెట్టడం. పరస్పర గౌరవంతో, ఆదరంతో పాల్గొనడం ముఖ్యం. అవతలివారి అభిప్రాయాలు, నిర్ణయాలను గమనంలో ఉంచుకుని వ్యవహరించాలి. సదుద్దేశంతో వ్యవహరించడం అంటే, అవతలి వారు వికీపీడియాను మెరుగుపరచే ఉద్దేశంతోనే పనిచేస్తున్నారని డిఫాల్టుగా భావించడం. విమర్శ గానీ, సమీక్ష గానీ చెయ్యాలంటే, వాడుకరి చేసిన పనుల గురించి మాట్లాడాలి గానీ, నిరాధారంగా వారికి దురుద్దేశాలను ఆపాదించకూడదు.
దిద్దుబాట్లు చేసే క్రమంలో వాడుకరులు ఏకాభిప్రాయానికి చేరుకుంటారు; ఓ పేజీలో ఎవరైనా మార్పు చేసినపుడు, దాన్ని ఇతరులు చదివి, బాగుందనుకున్నవారు అలాగే వదిలేస్తారు. సరిచెయ్యాలని అనుకున్నవారు దాన్ని మారుస్తారు. మీరు చేసిన మార్పును వెనక్కి తిప్పితే కష్టంగానే ఉంటుంది. కానీ, దాన్ని చిన్నతనంగా భావించకండి. ఎందుకంటే, వికీపీడియాలో ఏకాభిప్రాయాన్ని సాధించే క్రమంలో అది మామూలే. మీకు అసమ్మతి గానీ, సూచన గానీ ఉంటే, దాన్ని ఆ వ్యాసపు చర్చ పేజీలో రాసి, ఏకాభిప్రాయం వచ్చేవరకూ మర్యాద పూర్వకంగా చర్చించండి. ఇతర వాడుకరులు చేసిన దిద్దుబాట్లను పదేపదే వెనక్కి తిప్పకండి. దీన్ని దిద్దుబాటు యుద్ధం అంటారు. వికీపీడియాలో దీనికి అనుమతి లేదు. చివరి మార్గంగా, వివాద పరిష్కారం కోసం ఇతర వాడుకరుల సహాయాన్ని కోరవచ్చు.
.svg)
